Unë quhem Edlina dhe jam themeluesja e “Princi i Lumtur”.

Profesioni im fillestar është inxhiniere ndërtimi. Madje, kam punuar në këtë fushë për disa vite. Por veç karrierës personale dhe jetës aktive në punë, shumë shpejt u bëra nënë.

Ky ishte një ndryshim i madh në stilin tim të jetesës e për më tepër, në mënyrën si unë mendoja. Gjithmonë kam ndjerë dhe jam e bindur se fëmijët janë e ardhmja e çdo shoqërie. Për këtë, ata meritojnë më të mirën. Por në rrugëtimin tim personal si nënë, shpesh hasja vështirësi.

E nuk mund të rrija pa menduar;

Ku po rriten fëmijët tanë? Si po rriten? A është kjo më e mira që mund të bëjmë?

Prandaj vendosa ti dedikohesha me kohë të plotë mirërritjes së fëmijëve të mi. Krijova vizionin e një vendi paqësor, ku ata të ndiheshin mirë, të mësonin sa më shumë dhe të socializoheshin me bashkëmoshatarët e tyre. Kështu lindi “Princi i Lumtur”.

Unë vetë dal nga një kontigjent prindërish të pakënaqur nga çfarë mu ofrua në institucionet shtetërore e private ku shëtita për të sistemuar fëmijët e mi. Çfarë nuk më pëlqeu nga gjithçka që kalova, u përpoqa ti rregulloj në kopshtin tim. Çfarë mungonte, e solla si një risi.

Duke punuar me arkitektë për ndërtimin e një vendi miqësor për fëmijët, me dizajnerë për një arredim tërheqës e interaktiv, dhe me mësues të kualifikuar për kurrikula bashkëkohore, ne krijuam një vend i cili ofronte gjithçka fëmijët duan dhe u nevojitet.

Përveç programit mësimor, fëmijët bëjnë kurse dansi, pikture, kënge, shëtitje dhe aktivitete të panumërta në natyrë.

Për mua është shumë e lehtë të merrem me fëmijët, sepse unë zgjedh t'u flas me ëmbëlsi dhe dashuri, por duke i trajtuar si të rritur. Kjo më ndihmon shumë të kuptohem me ta. Sigurisht duke u futur në botën e tyre dhe duke lënë të lirë fantazinë. Të njëjtën gjë bënte edhe gjyshi im kur unë isha e vogël. Marrëdhënia magjike me të më bëri të kuptoj sa e rëndësishme është ti rrisësh mirë e kuptosh mirë të vegjlit e tu.

“Princi i Lumtur” është i pari në llojin e tij, por shpresoj jo i fundit. Shërbimi ynë, duhet të jetë një etalon për çdo kopësht tjetër, në Tiranë e rrethe, shtetëror ose privat, e çdo organizatë që synon të merret me edukimin e fëmijëve tanë.